المكس والماسترنج على السوفتوير والهاردوير

موضوع طويل ماينتهي لكن يوم عن يوم الحقيقة ان السوفتوير قاعد ياخذ مكان الهاردوير بمختلف ادوات المكس والماستر، وفي بعض النقاط السوفتوير تعدى الهاردوير تماماً.

تقريباً كل يوم يجيني شخص يسال على فيسبوك ماسنجر عن الموضوع هذا، وهل ينفع انه يستخدم الأداة الفلانية كسوفتوير بدل من هاردوير (لانه اكيد مايملك نسخة الهاردوير).

الان صحيح في فروقات بين كيفية معالجة الصوت بطريقة الانالوج وطريقة الدجتل الاثنين مختلفين، لكن الي يهمنا ويهمني ويهمك بالنهاية العمل النهائي، المستمع لما راح يسمع العمل صدقني ما يهمه اذا العمل تمكسج على بروتولز ولا كوبيس ولا كونسول اس اس ال!

العمل النهائي الي راح اسمعه (غالبا ع يوتيوب) بصيغة aac بجودة 128kbps هو هذا الي راح الناس تحكم عليه. الان كيف ما تريد تشكل وتطلع هذا الناتج النهائي طلعه، الموضوع يعتمد على اذنك وذوقك وخبرتك بالصوت!

المشكلة الحقيقية بالدجتل ليس انه سوفت وير ابداً … المشكلة بالورك فلو او كيفية العمل مع هذه البلوجنات (الي اغلبها ممكن ما يكون اصلي من الأساس)

1. كثرة الادوات (البلوجن) الموجودة عندك تخليك ممكن تضيع بينهم، وما توصل لمرحلة المعرفة الكاملة باحدهم.

2. سهولة ادراجهم بالانسرت على القناة تخليك ممكن تضيفهم بشكل عشوائي دون غرض حقيقي وصريح.

3. التعامل مع الايكولايزر والكمبريسور على انه مادة مرئية وغير مسموعة، كثير شباب تغلط بهذا الامر ويتعامل معهم بناء على الاشارة الي يشوفها في الشاشة وليس اللي يسمعها بالمونتر.

4. الاعتماد على ملفات الاعدادات الجاهزة presets ويضل الشخص يجرب فيها لين يحصل افضل صوت، هذه مشكلة كبيرة بصراحة لانها لعبة زهر ترميهم وانت وحظك ومعظم الاحيان الي راح تحس صوتها اعلى من غيرها راح تثبت عليها … لكن هل الصوت منسجم مع المكس؟

5. غالباً الي يملك هاردوير يعني عنده غرفة معالجة (اكوستك) لان الي خلاه يشتري كمبريسور بقيمة 1500$ مايخليه يسوي الاكوستك؟ … لكن بصراحة معظم الي يشتغلون على السوفتوير بشكل حصري بالكثير تلقاه مركب اسفنج على الحائط (هذا الاسفنج بالكاد يقدر يتعامل مع فريكونسي فوق 1000Hz وضمن ليفل SPL معين).

6. نسيت، الهاردوير يطلع هيدروم أعلى! … ياعزيزي المشكلة الأصلية هي عدم الاهتمام بتكنيك gain staging في بداية مشروع المكس، ولهذا السبب بعد دقيقة من العمل يحصل اختناق بالماستر وبالانالوج غصباً عليك تهتم لهذه النقطة ولا مراح تعرف تبدا تمكسج اصلاً. الفرق الوحيد هنا هو الدستورشن بالانالوج له صوت مختلف عن الدجتل، ومع هذا حرب الـ loudness قربت على الانتهاء بشكل رسمي، الان اعلى خدمة ستريم تسمح لك يادوب -12 ~ -13 LUFS ، وعلى الاغلب خلال السنتين ثلاثة القادمة العلو راح ينخفض اكثر وقد يصل للـ -15 ~ -16 وبالفعل هناك خدمات ستريمنج الان تعمل على هذا العلو بشكل رسمي ومصرح عنه.

7. لاحظت كثير من الشباب اصحاب الاستديو المنزلي مقتنعين تماماً ان علو الصوت يعتمد على الماسترنج، رغم ان الحقيقة علو الصوت يعتمد على البلانس و الداينمك بالمكس وليس الماسترنج! … ويترك الأمر لمرحلة الماسترنج وتشوف اللمتر قاعد يخفض -4 و -6 ديسبل وهذا شيء طبيعي راح يخفض الكوالتي والديناميك بشكل رهيب المفروض اللمتر يوم مايزيد يوصل -2 ديسبل اذا المكس صح.

الخلاصة انه لا تفكر كثير وتقارن واتعب نفسك بالتفكير ان شغلك اقل بالجودة لانك تعتمد فقط على السوفتوير، الافضل انك دائماً راقب سير عملك وكيفية تعاملك مع الادوات وحسن مستوى الاكوستك بالغرفة وهذا أهم شيء ممكن تشتريه للاستديو.

في مهندسين صوت معروفين عالمياً الآن يمكسجون بالكامل على السوفتوير (رغم ان الهاردوير موجود عندهم بكل انواعه) وشغلهم قمة بالكوالتي؟ لكن هنا يجب التنبيه ان عملية التسجيل للفوكال والآلات الموسيقية اللايف تتم بشكل انالوج بالكامل باستديو احترافي ومعدات احترافية (مايكات افضل الانواع، بري امبس وغيرها على جودة عالية) ، بمعنى ان الصوت لما وصل لمهندس الصوت الي راح يمكسج على السوفتوير هو بالاصل ماخذ صبغة الانالوج بالاساس ، وموضوع التسجيل هنا طبعاً مرحلة منفصلة تمامأً عن المكساج.

شاركني برأيك