واحدة من النقاط الي تضايق مهندسين المكس والماسترنج هي طلبات التعديل المتكررة على المكس او الماستر. الان لا تفهمني غلط اي مكس واي ماستر طالما تم عن بعد (دون حضور المغني او الموزع) غالباً بنسبة 95% راح ينطلب بعض التعديلات من المهندس مثلا رفع صوت المطرب اكثر شوي او توضيح اله معينة بشكل اكبر او خفض اله معينة وهكذا.
لا يوجد مشكلة مع هذه الطلبات وهو امر عادي، لكن عندما تكون هذه الطلبات تاتي على مهندس الصوت بشكل عشوائي وليس دفعة واحدة يصبح الامر اشبه بالكابوس لدرجة ان ممكن مهندس الصوت يوصل لمرحلة يكره الاغنية وهو شغال عليها. عموماً هذا ليس موضوعي الاساسي ولكنه احد اهم الاسباب لمشكلتنا الي نحاول علاجها في هذا الموضوع.
بعض المهندسين حولو شغل المكس او الماستر بالكامل إلى الدجتل (بلوجنيز) خاصة في مجال المكساج وهذا الشيء تم من قبل اسماء كبيرة جداً وعالمية في مجال مكساج الاغاني، بعض الاخر مازال يعتمد على بعض الهاردوير ومازال هناك جزء يعمل بالهاردوير فقط ويستخدم البروتولز فقط كمنصة Host.
لما تشتغل بالبلوجنز بالكامل بمجرد ما تفتح السشن باي وقت كان راح يرجع كل شيء مثل ماكان في اخر مرة اغلقته طالما لم تحذف احد البلوجنز المستخدمة في السشن، وهذا الامر غير متوفر في عالم الانالوج ولازم تسوي الامر هذا يدوي بالكامل وحتى ترجع كل شيء مثل ماكان (على الاقل وضعية اعدادات الاجهزة) فلازم يكون عندك سجل يسمى Recall Sheet تحتوي على جميع الاعدادات لكل جهاز مستخدم. هذا الامر ياخذ وقت طويل طبعاً.
بعض الاحيان واذا كنت تستخدم الكثير من الاجهزة فعملية تدوين وقراءة ال Recall Sheet ممكن تكون صداع صريح وبعض هذه الاوراق احياناً تضيع خاصة لما ينطلب منك تعديل على مكس سويته قبل شهر واكثر!
احد الاشخاص طلع بحل افضل من تدوين الاعدادات على الورق، برمج برنامج للويندوز والماك البرنامج يحتوي على الاجهزة على شكل بلوجن (لكن مجرد واجهة رسومية)، بحيث من خلال هذا البرنامج تقدر تسوي سشن جديد وتختار الاجهزة وتدخل الاعدادات الخاصة بكل جهاز وثم تحفظ السشن واذا احتجت ترجع له باي وقت راح يكون متاح بشكل واضح لان واجهة كل بلوجن بالضبط نفس واجهة الجهاز الحقيقي فعملية تدوين الاعدادات او اعادة تنفيذها على الاجهزة الحقيقية راح تكون اوضح واسهل من استخدام الورق والطريقة التقليدية القديمة.
فكرة الخدمة جميلة وفعالة ومفيدة في حال كنت مهندس مكساج فقط او مهندس ماسترنج او تقوم بعمل الاثنين. لنفرض ان عندك اجهزة كمبريسور LA2A او 1176 او SSL G-Bus بهذه الحالة راح تشتري الواجهات الرسومية الخاصة بهذه الاجهزة من خدمة Session Recall بمبالغ رمزية ومن بعدها تقدر تستخدم هذه الواجهات في البرنامج.
رابط خدمة سشن ريكول session-recall.com
📮 المتابعة عبر البريد الالكتروني
عند الاشتراك سيصلك جديد منشوراتي ومقالاتي على ايميلك. لا يتم نشر اي اعلانات ابدًا، فقط المقالات التي انشرها هنا في مدونتي هذه.
